Monthly Archives: September 25, 2008, 5:53 am

புத்தகம் – நெம்பர் 40, ரெட்டைத் தெரு

 

கிழக்கு பதிப்பக வெளியீடு

கிழக்கு பதிப்பக வெளியீடாக நேற்று (செப்டம்பர் 25, 2008) ‘நெம்பர் 40, ரெட்டைத் தெரு’ வெளியாகி உள்ளது.

இது என் பதினேழாவது நூலாகும். கிழக்கு பதிப்பக வெளியீட்டாக (ஒலிப் புத்தகத்தையும் சேர்த்து) இது என் ஏழாவது புத்தகம்.

நண்பர் தளவாய் சுந்தரம் இதன் பதிப்பாசிரியராகச் செயல்பட்டு அழகான முறையில் புத்தகத்தை உருவாக்கியிருக்கிறார் (நன்றி தளவாய்!).

நூல் பற்றிய சில தகவல்கள் -

பக்கங்கள் 232
விலை ரூ 125

ISBN 978-81-8368-933-5
Kizhakku – 340

Kizhakku – An imprint of New Horizon Media Pvt Ltd
Website http://www.nhm.in/

மும்பை விருந்து

 

வார்த்தை’ பத்தி செப்டம்பர் 2008

தமிழ்ப் படைப்பிலக்கிய ரசனைக்கும் ஆங்கிலப் படைப்பிலக்கிய ரசனைக்கும் உள்ள வேறுபாடு சென்னைக்கும் மும்பைக்கும் நடுவே ஆறு அல்லது அறுநூறு வித்தியாசம் கண்டுபிடிக்கிறது போல் சுவாரசியமானது. தமிழில் ஒரு நாவல் வெளிவந்தால் கிணற்றில் ஊறப்போட்ட கல்லாக அது அநேகமாக லைபிரரி ஆர்டரில் சகாய விலைக்கு மொத்தமாகக் கொள்முதல் செய்யப்பட்டு கிளை நூலக மேல் ஷெல்பில் செருகி வைக்கப்படும். கிட்டத்தட்ட நாற்பது வருடம் கழித்து ‘நினைத்துப் பார்க்கிறேன்’ ரேஞ்சில் யாராவது அதைப் பற்றி மெதுவாக குரல் விட ஆரம்பிப்பார்கள். அப்புறம் அங்கே இங்கே என்று நாலு குரல் ஆமோதித்தும், ஆட்சேபித்தும் இலக்கியப் பத்திரிகையில் எழுத, அநேகமாக நாவலாசிரியர் ஆவி ரூபமாக இந்த இலக்கிய உரையாடலை அனுபவித்தபடி ஆத்மா சாந்தியடைந்து அடுத்த பிறவி ஆங்கில நாவலாசிரியராகப் பிறக்க அப்ளிகேஷன் போட்டிருப்பார். எல்லோருக்குமா அந்த அதிர்ஷ்டம் கிட்டும்?

உலகைக் குலுக்கும் வாரம் இது

 

லீமன் பிரதர்ஸ், ஏ.ஐ.ஜி, எச்பாஸ் .. இனி?

இந்த 2008-ம் ஆண்டு எனக்கு முக்கியமானது என்று பத்து நாள் முன்னால் தான் எழுதினேன். இப்போது, அதிமுக்கியமானது என்று மாற்றி எழுத நேர்ந்து விட்டது.

இந்த வாரம் தொடங்கியபோதே ஏதோ சுவரம் பிறழ்ந்த இசையாக, மனதில் ஒரு சஞ்சலம். கண்ணன் திருவடிகளைப் போற்றி வழக்கமான கடமைகளோடு வளைய வந்தபோது, முதல் அதிர்ச்சி. செப்டம்பர் 15, திங்களன்று லீமன் பிரதர்ஸ் வங்கி திவால் ஆனது. One of the world’s largest and respectable investment banks with an history of 150 years… 2 .8 பில்லியன் டாலர் நஷ்டக் கணக்கு காட்டப்பட்டு இருக்கிறது. 100 பில்லியன் டாலருக்கு அதிகமான trading exposure காரணமாக உலகம் முழுவதும் பல முக்கியமான வங்கிகளுக்கு market risk துர்சொப்பனங்களை நிஜப்படுத்தும் வண்ணம் counterparty exposure நிதி நெருக்கடி. அமெரிக்காவிலும், இந்தியா உட்பட அந்த வங்கி இயங்கி வந்த பல நாடுகளிலும் கிட்டத்தட்ட 35,000 பேர் வேலை இழக்கும் அபாயம். டோ ஜோன்ஸ், நிப்டி, சென்செக்ஸ், ஃபட்ஸி என்று பங்குச்சந்தை இண்டெக்ஸ்கள் வேகமாகச் சரிந்தன.

காப்பீட்டுத் தொழிலில் உலகப் பெரு நிறுவனமாக இருக்கும் AIGக்கு அமெரிக்க அரசு – பெடரல் ரிசர்வ் அபயமளித்து 50 பில்லியன் டாலர் கொடுத்து தன்மானத்தை மீட்டது. மெரீல் லிஞ்ச் தன் அடையாளத்தை இழந் பேங்க் ஆப் அமெரிக்கா என்ற வங்கிக் கடலில் கரைந்து போனதும் இந்தத் திங்களன்று தான்.

ஒரு வருடத்துக்கு மேலாக Hedge Fundகளின் தயவில் உலகப் பொருளாதாரம் வீழ்ச்சி அடைந்து வந்தது இன்று கிட்டத்தட்ட பரிபூரணமாகி உள்ளது. புஷ்ஷோ வரப்போகும் ஒபாமோவோ தற்போது சமாளிக்க வேண்டிய பயங்கரவாதிகள் அல் க்வய்தாவோ ஒசாமா பின் லாடனோ இல்லை. இந்த ஹெட்ஜ் ஃபண்ட்களைத்தான்.

Financial Crisis என்றும் உலகப் பொருளாதார நெருக்கடி என்றும் ஸாம்பத்திக பிரதிஸந்தி என்றும் பலமொழிப் பத்திரிகைகள் முதல் பக்கத்தில் அலறிய செவ்வாயன்று பங்குச் சந்தை மேலும் வீழ்ந்தது.

நேற்று புதன்கிழமை இந்த உலக நிகழ்வு ஒரு சராசரி மனிதன் என்ற நிலையில் என்னையும் பாதித்தது. கடந்த எட்டு ஆண்டுகளில் என் இரண்டாவது பணியிடமாக மாறி இருந்த ஹாலிஃபாக்ஸ் பேங்க் ஓஃப் ஸ்காட்லாந்து வங்கி (HBOS) இல்லாமல் போய்விட்டது. லாயிட்ஸ் டிஎஸ்பி வங்கிக்கு அதன் முழு உடமையும் வசமாக, நானூற்று அறுபது வருட வரலாறு கொண்ட என் ஹெச்பாஸ் நோ,பாஸ் இப்போது. (இந்தத் தளத்தின் ஆங்கிலப் பகுதியில் Museum on the Mound என்ற தலைப்பில் இந்த வங்கியின் வரலாறு பற்றிப் பகிர்ந்து கொண்டுள்ளேன்.)

ஐநூறு பில்லியன் பவுண்ட் மதிப்புக்கு mortgage – வீடு கட்டவும், வீட்டின் பேரில் கடன் அளித்தும் சராசரி பிரிட்டீஷ் குடிமக்களின் வாழ்க்கையில் பிரிக்கமுடியாத ஓர் அங்கமாக மாறியிருந்த ஹெச்பாஸ் வீழ்ந்ததை பிரிட்டன் இனி எப்போதுமே மறக்காது. அவர்களுக்கும் என்னைப் போலவே சொந்த சோகம் இது.

எனக்குப் பழக்கமான இங்கிலாந்தும் ஸ்காட்லாந்தும் ஹெச்பாஸ் இல்லாமல் எப்போதும் முழுமை பெறாது. எடின்பரோவும், யார்க்ஷ்யரும், லண்டனும் அந்த வங்கியே முகமாக நினைவுகளில் எப்போதும் நிறைந்திருக்கிறது. இன்னொரு முறை இங்கிலாந்து போக வேண்டிய சூழ்நிலை வரக்கூடாது என்றே இறைவனைப் பிரார்த்திக்கிறேன். 40, ரெட்டைத்தெரு இல்லம் இல்லாத என் பிறந்த மண்ணுக்கு நான் திரும்புவதைப் போல், துயரமான நிகழ்வாக இருக்கும் அப்படிப் போகவேண்டி வந்தால்.

எச்பாஸ் வங்கியில் 40,000 ஊழியர்களுக்கு வேலை நிரந்தரமில்லாத நிலை இன்று. அவர்களில் எத்தனையோ ஸ்காட்லாந்துக்காரர்களும், யார்க்ஷ்யர் வாசிகளும் எனக்கு இன்னும் நெருங்கிய நண்பர்கள். அவர்களுக்கு எந்தக் குறையும் ஏற்படக்கூடாது என்று பிரார்த்திப்பதைத் தவிர நான் இப்போது செய்யக்கூடியது ஏதும் இல்லை.

உலகப் பொருளாதார நெருக்கடி நேரத்தில் முக்கியமாகப் பாதிக்கப்படுவது கம்ப்யூட்டர் டெக்னாலஜி துறை. I.T வல்லுனர்களாக, பல நாடுகளிலும் வசிக்கும் என் அன்பு நண்பர்களுக்கு, குறிப்பாக இளைஞர்களுக்கு ஒரு மூத்த சகோதரனாக என் அன்பான அறிவுரைகள் –

1) இருக்கிற வேலையில் இருந்து மாற வேண்டும் என்று முடிவெடுத்திருந்தால், அதை மறுபரிசீலனை செய்யுங்கள். எனக்கு ப்ராஜக்ட் லீடராக ப்ரமோஷன் கிடைக்கவில்லை, அன்யூவல் அசெஸ்மெண்டில் என் போன வருடச் சாதனையைக் கண்டுகொண்டு எப்போதும்போல் கணிசமான பெர்பார்மன்ஸ் போனசும், ஊதிய அதிகரிப்பும் வரவில்லை என்பதெல்லாம் பொறுத்துக் கொள்ளக்கூடிய சங்கதிகள் இப்போது.
2) ‘பெஞ்சில் இருக்கிற’ நண்பர்கள் cross-skilling செய்து கொள்ள வேண்டிய நேரம் இது. மெயின்ப்ரேம் காரர்கள் எண்டர்பிரைஸ் ஜாவாவும், ஜாவா, டாட்நெட் வல்லுனர்கள் CUDA, SAP, ஏன் அது மட்டும், Assembler, mainframe cobol என்றும் கூட பரிச்சயம் செய்து கொள்ள வேண்டியது அவசியம். CBAP, PMP போன்ற தேர்வுகளில் வெற்றி பெறுவதும் முக்கியம். ட்விட்டரும், பிளாக்கும், குமுதம், விகடன் போன்ற இணையத் தளங்களும், சவிதாபாபியுமாகப் பொழுதைக் கழிப்பதைக் குறைத்துக் கொள்ளலாம். இராமுருகன்.இன் கூடத்தான்!

கண்ணன் திருவருள் திண்ணம் நமக்கு உண்டு.

வியாழன், செப்டம்பர் 18,2008

உத்திராடம் – திருவோணம் – அவிட்டம்

 

ஓணக்காலக் குறிப்புகள்

நேற்றைக்கு (செப்டம்பர் 12) திருவோணத் திருநாள். காலையிலேயே குளித்து மகாலிங்கபுரம் ஸ்ரீகுருவாயூரப்பன் – ஐயப்பன் அம்பலங்களில் வழிபாடு. ஓணக் கோடி உடுத்து நூற்றுக்கணக்கானவர்கள் கோவில் பிரகாரத்தில் வலம் வந்து கொண்டிருந்தாலும் ஆகக் குறைவான இரைச்சல், சத்தம். ஸ்ரீபலி தொடங்கும் முன் கண்ணன் சந்நிதி படியருகே நின்று மாரார் சோபான சங்கீதம் பாடுவது கோவில் முழுக்க ஒலிக்கிறது. தாளமும் நாதமுமாக அவருடைய குரலோடு கூட இழைகிறது தோளில் மாட்டியபடி அவர் வாசிக்கும் இடக்க.

எட்டு மணிக்கு தி.நகர் கிருஷ்ணா ஸ்வீட்சில் படியேற, எனக்கு முந்தியே பத்துப் பேர் கையில் பாத்திரத்தோடு காத்திருந்தார்கள்.

யூனிட்

 

மாலை நேரக் குறிப்புகள்

இந்த யூனிட்டில் காலாகாலமாகக் கடைப்பிடிக்கப்படும் ஒரு பழக்கம் உண்டு. உருவாக்கப்பட்டுக் கொண்டிருக்கும் திரைப்படத்தின் கதையைப் பற்றியோ, யார் யார் பங்கு பெறுகிறார்கள் என்பதைப் பற்றியோ வெளிவட்டத்தில் விவாதிப்பதோ தகவல் பரிமாறுவதோ இல்லை என்பதை ஒரு எழுதாத கோட்பாடாக எல்லோரும் கடைப்பிடிக்கிறார்கள். இந்தப் பூடகத் தன்மை படைப்பு குறித்த ஆர்வத்தைத் தூண்டி சுவாரசியமான எதிர்பார்ப்புகளோடு காத்திருக்க வைக்கிற நேசமான ஒரு விளையாட்டு. இதை எல்லோரும் ரசித்து ஈடுபடுகிறது தன்னிச்சையாக நடைபெறும் ஒன்று. பத்திரிகைகளிலும் மற்ற ஊடகங்களிலும் அவ்வப்போது மர்ம யோகி பற்றி வெளியாகும் ஊகக் கச்சவடத் துணுக்குகளைப் பகிர்ந்து கொண்டு ரசிப்பதும் இதில் அடங்கும்.

யூனிட். நான் நுழைந்தபோது இளைஞர்களே பெருவாரியான ஓர் உற்சாகமான கூட்டத்தைப் பார்க்கிறேன். வாசல் வரை வந்து வழக்கமான அந்நியோன்யத்தோடு வரவேற்ற இவர் ஒவ்வொருவராக அறிமுகப்படுத்தி வைக்கிறார்.